Shillong, May 29: Sonibar salo Opposition dolni dilgipa Mukul Sangma-ni dilanichi Congress Legislature Party (CLP)-ni tom·aniko ong·atangenba, Meghalaya a·doko COVID man·e sianggiparang batroroengani gimin suk ong·gijaniko paraktokaha.
Meghalaya a·doko COVID man·e sianggipa manderangni nokdangrangna gong 50,000-kosan on·na gita sorkarini tik ka·ahani giminba CLP suk ong·gijaniko parakaha aro COVID-19-ni giproroanikoba a·songo National Disaster ine parakmanahani gimin COVID man·e sianggiparangni nokdangrangna National Disaster Management Act-ni ning·o dongimin niam gita tangka paisarangko on·china sorkariko didiangaha.
Meghalaya a·doko COVID man·giparangko donchakna gita chu·onga gita COVID hospital-rangko aro COVID care centre-rangko seng·gnangan tarisamsojahani giminba CLP-ni dilgiparang, a·dok sorkarini kamo suk ong·gijaniko paraktokaha.
COVID-ko warachakanio ASHA worker-rangba an·tangtangko on·kange kamrangko ka·tokengani gimin uamangni kamrangko mittelpilani chin gita tangka paisarangko nangani kri on·skachina gitaba CLP, a·dok sorkariko didiangaha.
Meghalaya a·dokni bang·bata biaprango donggipa CHC aro PHC-rango chu·onga gita sanna banani cholrang dongjani a·sel Shillong songjinmani hospital-rangonasa sagiparangko aro mongsongbate COVID man·giprangko rimbana nangengani giminba CLP suk ong·gijaniko parakataha aro pilak biaprangon health centre-rangko namdapatchina sorkariko didiangaha.
Indake ong·engon, a·dokni dingtang dingtang hospital-rango aro Corona care centre-rango sorkarini on·enggipa sanna banani cholrangko nina gita CLP-ni dilgiparang, mikkang antioni ia health centre-rangko aro Corona care centre-rangko re·e nina gitaba ia tom·anio tik ka·angaha.
