Shillong, May 4: Meghalaya a•doko Central Reserves Police Force (CRPF)-ni gimik sak 1,257 sipairangoni sak 1049 sipairangko COVID tika su•mane da•o 98 percent-kode man•gopaha.

Iani bidingo kobor ra•timgiparang baksa agangrikengon, COVID-ni tikarangko su•chengaonin CRPF-ni sipairangko tika su•na a•bachengaha ine Mongolbar salo, 67 Battalion CRPF-ni commandant Alok Bhattacharya parakataha. Gipin biaprangoni re•bapilenggipa sipairangko dingtang donchina sorkarini ge•etan baksana, sipairangko COVID-19-na porikka ra•anio negative ong•genchimoba uamang sipairangko name nirokenga ineba Bhattacharya aganaha.

“Sipairang apchaketgipa biaprango dongna nangani a•sel sabisirangko man•ningbata,” ine CRPF-ni commandant parakataha.

Bhattacharya-ni aganani gitade, biap damsaoni biap damsaona re•ruraenggipa aro chutti re•angenggipa sipairangna simsakbatna nanga indiba uamang iandakgipa sipairangko dingtang donenga aro niamrangko ja•rikenga.

Koborko on•ani gitade, Shillong songjinmani Polo-o donggipa CRPF hospital-koba tika su•chakna jakkalenga aro ia biapo ramram manderangkoba su•enga.

Indake ong•engon, 67 Bn CRPF-ni CMO Dr Utpal Gogoi-ni u•iatani gitade, ia palang ge 10 donggipa hospital-o da•o dipet uamang palang ge 4-chi chalaienga aro ia hospital-ona uamang oxygen aro bipap-rangko ra•baenga.

Da•o dipet ia hospital-o COVID man•giparang sak 19 donga aro uamang gimikan namkala obostao ong•enga ineba Dr Gogoi parakataha.