Shillong, Aug 10: Meghalaya a•doko gnigipa North East Olympic Games 2022-ko re•baenggipa October 30 tarikoni November 6 tarikona a•dokni skotong Shillong songjinmao sokachakna sienga.
Ia kal•susaaniko sokachakenggipa Organising Committee-ni u•iatani gitade, ia North East Olympic Games-o damchet a•dokrang bakko ra•anggen aro ming 18 kal•susaanirangko ong•atanggen.
Iani bidingo kobor ra•timgiparangna talataniko on•angengon, ia North East Olympic Games-ko ong•atanio damchet a•dokrangoni gimik sak 3000-mangni gita kal•susagiparang, ming 18 kal•susaanirango bakko ra•anggen ine Meghalaya a•dokni Sports Minister Banteidor Lyngdoh parakataha.
Ia North East Olympic Games-ko sokachakna gita re•anggipa bilsionin sorkari tarisamsoaha aro ia bilsio Meghalaya a•dokni bilsi 50 gapanikoba maniengani gimin ia kal•susaaniara namen dingtangmanchagipa ong•gen ineba Lyngdoh parakataha.
Indake ong•engon, ia North East Olympic Games-ni bang•bata kal•susaanirangkon NEHU campus-o donggipa Sports Authority of India (SAI)-o ong•atanggen aro mitamkode JN Stadium-o ong•atgen ine Meghalaya State Olympic-ni working president John F Kharshiing parakatskaaha.
