Shillong, Jan 25: Meghalaya a·doko skulrangna on·gipa chuttiko ra·dodapatani ja·man da·o pilak skulrangkon kulipiltaina a·bachengengaha.

Education department-oni u·iataniko on·angani gitade, Shillong songjnmao aro uni wilwilao donggipa skulrangode class I-oni class XII-ona kingkingan internet gitasa class-rangko ra·angkugen indiba a·dokni gipin biaprangode class I-oni class XII-onan skultangtangon class-rangko ra·anggnok.

Meghalaya a·dokni Education Minister Lahkmen Rymbui-ni parakatani gitade, a·doko ong·enggipa obostarangko department-ni gita nipilangani ja·man skulrangko kulipiltaiani bidingo u·iataniko on·angaha.

Class 10 aro class 12-ni board porikkarangkode a·bachengo donsogimin gitan ong·atangaigen ineba Education Minister parakataha.

Bilsi 15-oni bilsi 18 ong·gipa chadamberangna COVID-ni tikarangko su·engahaoba a·doko tika su·anirang komikuenga ineba ua an·tangtangni dedrangko tika su·e ra·china gita ma·a paarangko didiataha.