Shillong, May 26: A•songni gipin biaprango gitan Lord Buddha-ni chang 2565-gipa atchiani salko maniani bak gita Meghalaya a•dokoba Vaishakha Purnima-ko Budbar salo maniangaha.
COVID-19-ni giproroaniko champengna dongimin niamrang dongani gimin ia salko Shillong songjinmao Buddhist dilgiparang, dal•e program-rangko ong•atgija an•tangtang bi•aniko dake maniangskaaha.
Ia salko gisik ra•na gita Buddhist dilgiparang an•tangtang bi•engon, a•gilsako tom•tomaniko man•piltaina aro a•gilsak gimiko giproroenggipa Coronavirus-ko bon•atchina Bodhi bolni kokkimao bi•chakangtokaha.
Shillong Buddha Temple Stewardship Committee-ni secretary Aroop Barua-ni parakatani gitade, ia salara uamangna namen dingtangmanchagipa ong•a aro ia gita salo a•gilsak gimikon Buddhist-rang, Trivedi Jayanti ine minge Lord Buddha-ni atchiani salko manironga.
Ia salo committee-ni membor-rang, COVID-na dongimin niamrangko ja•rike, Shillong songjinmao donggipa Buddha olakkiram noko dingtangmancha jinma bi•rimaniko dakangaha.
