Shillong, Jan 17: Meghalaya sorkarini Administrative Building-ko East Khasi Hills a•jani Mawpdang Mawkhanu samba jolo donggipa New Shillong Township-ona apjitangskana gita sorkari ra•chakmanaha ine Sombar salo, a•dokni Home Minister Lahkmen Rymbui parakataha.

Sombar salo Cabinet tom•ani ja•man, kobor ra•timgiparang baksa agangrikengon, ia gital biapo acre 800-na baten a•arangko sorkari ra•manaha ine Rymbui parakataha.

“Shillong songjinmao biaprang apchangket ong•roroangengahaon, ia New Shillong Township-koba apalroroatskana nangengaha aro uandaken ia Administrative Building-koba sorkari, gital biapona apjitangskagnok,” ine a•dokni Home Minister parakataha.

Ia gital Administrative Building-ko Mawpdang Mawkhanu-o rikgen aro iana pangchakani ro•ongko re•baenggipa January 21 tariko songe on•anggen ineba Rymbui parakataha.