Shillong, Feb 6: Salgro salaram jolni dilsretako man·e namgija ramao re·gipa bang·bata chadamberangan Pa Modi-ni Prime Minister ong·ani ning·o namaona pilbatokaha ine Union Law & Justice Minister Pa Kiren Rijiju Feb 5 tariko kobor ra⋅timgiparangna aganaha.
Salgro Salaram a⋅dokrango bang⋅a chadamberangan dilsretaniko man⋅e bobil dolo nape so·sojengjeng ong·atani kamrangko ka⋅engachim aro anga an⋅tangan batanggimin bilsi 5-o Minister of State for Home Affairs ong⋅e iarangni gimin rongtalen ma⋅siachim. A⋅doko tom⋅tomani gride silroroani dongja ine ma⋅sie Pa Modi-ni sorkarini ning·o rake kam ka⋅aha aro bang⋅bata chadamberangkon namaona rimbapilna man⋅aha ineba Pa Rijiju aganaha.
Shillong songjinmao boma bretate jingjengatenggipa HNLC bobil dol-ni bidingoba ma⋅mong sorkari maikoba dakgenma ine sing⋅on, ma⋅mong sorkari je somoioba a⋅dokni tom⋅tomanina dakchakna tarie donga, haida ian bobil dol ong⋅manchaode iani bidingo ui⋅e ma⋅sigipa manderangni dakchakaniko ra⋅an baksa sason ka⋅giparangni ma⋅sichakgrikani kam ka⋅anichi chu⋅sokatna man⋅aigen ineba Pa Rijiju agandapaha.
