Williamnagar, Nov 24: Batanggimin salo West Jaintia Hills a·jani ning·ogipa Mukroh songo Assam police-ni ka·saninggija dake slai goanichi sianggipa aro duko ga·akgipa nokdangrang baksa apsan kalimpaaniko mesokani chin gita East Garo Hills-ni NGO-rang Bristibar salo, East Zone-ni GSU office mikkango mombatirangko so·an baksana bi·chakanirangko dakangaha.

Obosta ong·aniko jegalangan baksa, mombatirangko so·e bi·chakanganio, Simsanggre-ni nangrimgimin dingtang dingtang NGO-rang, jekai GSU, FKJGP, AAYF, FAF, AIGU WGCSU, Auto-Taxi Association, Sumo-Pickup Association aro chatro-chatrirang gimikan bakko ra·angtokaha.

Iana skang, East Garo Hills a·jani Garo Students’ Union (GSU), a·sel-obostao sianggipa nokdangrangna uamangni kalimpaaniko on·atanio, dos dakgiparangko rim·e sasti on·an baksana, ua biapo Meghalaya police outpost-ko songchina gita a·dok sorkariko mol·molangaha.