Shillong, Nov 30: Mukroh songo songdongenggipa Khasi manderangko ‘niam gri songdonggiparang’ ine aganahani gimin Budbar salo, Hynniewtrep Achik National Movement (HANM) dol, Karbi Anglong Autonomous Council (KAAC)-ni chief executive membor (CEM) Tuliram Ronghang-ko raken jegalataha.
Iani bidingo kobor ra•timgipa manderang baksa agangrikengon, KAAC-ni CEM Tuliram Ronghang-ni agangipa kattarangara Karbi aro Meghalaya a•doko songdongenggiparangni gisepo meligrikgijaniko ra•baani gita ong•gen ine HANM-ni president Tyllang Thongni parakataha.
Ian Meghalaya aro Assam sorkarini gisepo agangrikna nangenggipa kamsa ong•ani gimin jatrangni gisepo meligrikgijaniko ra•bana nangjachim ine janapatengon, ia songo songdongenggipa Khasi manderangko ‘niam gri songdonggiparang’ ine KAAC-ni CEM Tuliram Ronghang-ni agananiara Khasi aro Karbi jatni gisepo meligrikgijaniko ra•baanisa ong•gnok ine Thongni parakataha.
Indake ong•engon, a•dok damgnini simarango ong•enggipa a•selrangko politics kal•gija, ia jolrango tom•tomaniko ra•bapilna gita political dolrang nangrime kamko ka•nasa nanga ine HANM Ranikor circle-ni chief advisoe John Sangma parakatskaaha.
Sima jolrango songdongenggipa manderangko chel•chakna gita sima jolrango SWAT, SOT aro SF-10 gita dakgipa sipai dolrangko donatchinaba ua a•dok sorkariko didiataha.
