Tura, Jan 31: Trinamool Congress (TMC)-ni ku·rachakenggipa ‘WE Card’ scheme-ara election-o manderangko ropna dakmikgipa scheme-san ong·aia aro ia ‘WE Card’-ko Mukul Sangma-ni Songsak constituency-on ‘bakki card’ ine manderang jegalenba so·e galtokenga ine Sombar salo, Meghalaya a·dokni Chief Minister aro National People’s Party (NPP)-ni national president Conrad K Sangma parakataha.
Sombar salo, South Tura constituency-na election campaign-ko a·bachengatani somoio Chief Minister, ia kattarangko aganaha.
Sangma-ni parakatani gitade, TMC-ni ku·rachakenggipa ‘WE Card’-chi manderang maming namgnirangko man·jawa ine nikenba Songsak aro Williamnagar constituency-rangode so·e galtokengaha.
“Election-ni somoirangode manderangko salna gita jegitaba ku·mikchetanirangko dakna man·aia indiba chinga NPP-de iandake tol·e ku·mikchetanirangko dakna namnikgiparang ong·ja. Election-na skang jekon chinga manderangna ku·rachakaha, election-ni ja·mano uko chu·sokatanian chingni daito ong·a,” ine Sangma aganaha.
Indita bilsirangna maming namdapani gri ong·gipa Tura jillao da·o dingtanganiko nikna a·bachengengaha ineba Chief Minister parakataha.
“Tura jillako salgro salaram a·dokrango nambatsranggipa jillarangoni damsa ong·atanian chingni nisan ong·enga,” ine Sangma ku·rachakaniko on·angaha.
Tura jillao bakan auditorium baksa state of art convention centre aro mini secretariat dakna sienggipa integrated administrative complex-ko rikgnok ineba ia tom·anio Chief Minister parakataha.
“Da·o rikenggipa PA Sangma Sports Complex-an Tura jillao namroro silrorobaenganiko mesokani ong·enga aro ia sports complex-o an·chingna robol kal·chakani stadium-kode matchotmanaha. Ia PA Sangma Sports Complex-o swimming pool, badminton, basketball aro gipin kal·ani cholrangba donggen,” ine Sangma aganaha.
