Kohima, Dec 30: Re•anggipa December-ni 4 aro 5 tarikrango Nagaland a•dokni Mon a•jao sak 14 dosgri Konyak chadamberangko so•ote galanio jak donggipa sipairangko ta•raken sasti on•china gita Naga dolrangoni Konyak Union dabiangaha.

Sak 14 dosgri Konyak chadamberangko so•ote galanio jak donggipa Indian Army-ni officer-rangko sasti on•china gita ta•raken India sorkari raiko on•na nanga ine Konyak Union dabiangaha.

Ia a•selni bidingo maikoba dongnuna jotton ka•ani donggenchimode uan Konyak-rangni kosako ja•ku de•ani gita ong•gen ineba Konyak Union mikrakataniko on•angaha.

“Uni gimin Konyak-rangara India a•songni manderang ong•ama ong•ja India sorkari, kamchi mesokchina,” ine Konyak Union-ni president S Howing Konyak parakataha.

Indake ong•engon, ia a•selni bidingo inquiry-ko dakna gita Indian Army-ni songe on•gipa Inquiry Court, Budbar salo a•sel ong•chakgipa Oting songona re•angaha ine official-rang kobor on•aha.