Guwahati, Oct 21: Me·a-me·chik turimako noksa ra·e internet-rango skatang man·aigipa video-ko apsan porairimska me·chik saksa baksa nirime uko ong·gija dakna am·o jechakani gimin bilsi dok ong·gipa me·chik bi·sako ka·saninggija so·otgipa sakgittam me·a bi·sarangko Butbar salo Nagaon police rim·aha.
Assam-ni Nagaon district-o ia ong·anga obostako sandirokatgipani police-ni aganani gitade, bilsi 8 aro bilsi 11 ni gisepo ong·gipa sakgittamkon bichalni jako on·aha indake uamangoni saksagipani pagipako sakkirangko bon·atna jotton ka·ani gimin rim·aha.
Skoo aro ka·bako mata-bu·ani chin gnang ua me·chik bi·sani manggisiko noktangoni gimae dongani ja·man mija Sombar salo galchipe donenggipa ro·ong jetgipa biapni paikana gitchamoniko man·ahachim.
A·bachenge sandiatao ma·sianiko janapatani gitade, uko maiba bostuchi dokaha ine police talataha. Indake, manggisiko rate porikka ka·ani report-ko da·o sengengkua, indiba manggisiko nikchengaoniko police-ni aganani gita, ian me·chik bi·sako kal·akna jotton ka·e uko doka-satasa indiba til·ekmanchaade ong·taija.
“Ro·ong jetgipa biapko nitimenggipa security guard-ni aganani gitade, me·chik bi·sani manggisiko skanggipa sakgittam me·a bi·sarang nikchengaha jeoni saksara uni depantean ong·achim. Bi·sarangni aganani gita, uno dongtimgipa guard ua manggisiko biaponiko ra·gale galaha indiba jensomoio guard-o sing·sandianiko daktaion ia ong·gija kamko me·a bi·sarangsa dakaha ine aganskaaha” ine a·jani subdivisional police officer, Mrinmoy Das talataha.
Police-ni agangankuani gitade, guard-ni depante aro gritang bilsi 11 ong·gipa sakgni aro gipin bilsi chet ong·gipa me·a bi·sa sakgitaman ua me·chik bi·sani noksulrangan ong·tokachim. Online gita skie ra·nasa pagipa, depantena smartphone-ko bree on·ahachim indiba sakgni gipinrang baksa ong·gija me·a-me·chik turimgipa video-rangko nina gisik cha·suatako man·tokskaaha ine police agandapataha.
“Sombar salo uamang sakgittam, me·chik bi·sako ro·ong jetgipa biapona rimange uko ong·gija dakna jotton ka·ahaon ua me·chikni jechake uamangni kosako badi ka·na ka·mikkenataon me·a bi·sarang uko ro·ongchi skoo aro ka·bako doke siataha aro manggisiko paikana gitcham ning·o donnue donaha,” ineba Das koborna taldapataha.
