Jowai, Dec 08: A·jaoni nambatgipa skie on·enggiparangko seokenba National Assessment and Accreditation Council (NAAC)chi ra·chakange Grade “B” ni gadangko on·anina kusi ong·enba, Jowai-ni Kiang Nangbah Government College-ni bil man·giparang, skigiparang, poraigipa chatro-chatrirang aro staff-rang Butbar salo programko ong·ate maniangaha.
Ia programo a·dokni Education Minister Pa Lahkmen Rymbui mongsonggipa sokgipa ong·e bakko ra·angaha, je tom·anion a·jani Deputy Commissioner aro College-ni committee-ni Chairman aro advisory-ba ong·enggipa Garod LSN Dykes, Deputy Director Dr. B.D Cajee aro DHTE-ni Deputy Director E.K Mawkhiew, RUSA Consultant, Dr. S R Lyndem-maang gimikan dongpatokaha.
Janapjolna gita, NAAC team, mija November jani 15 aro 16 tarikrango Jowai-ni Kiang Nangbah Government College-ona wenangahachim. Doloni unsalo re·anggiparangara – Chairman, Pa Ashutosh Ghosh, Member Coordinator, Professor Mohammad Arif aro Member, Dr. Ajay Bhamare-mang sakgittam ong·achim.
A·jaoni poraienggipa pilak chatro-chatrirangna college-o skie on·ani bidingo nirokna gita 1st cycle Inspection aro assessment-na wenangani somoio NAAC team-ni sandie man·anirango pangchakesa ua college-na ia gadangko on·angaha.
Tom·ao jinmana aganangengon, NAAC-chi ra·chake dingtangmancha seokako man·chenggipa sorkarini college ong·ani gimin uano kam ka·enggipa gimikkon man·gope uamangni rakbee aro gisiko nange kamko ka·ahanina Pa Lahkmen Rymbui, kusinirangko chapatenba, iandakgipa gadangko man·aniara a·dokni gipin government college-rangkoba mikkangchi nambatgipa aro silrorogipa ong·na gita didianirangko on·gen ine minister parakataha.
Nambatgipana seokako man·e iandakgipa gadangko on·anichi college-ni gunkoba baridapatani gita ong·gen aro iachi re·baenggipa salrangonaba ia apsan miksonganion kamrangko ka·angkuna gita college-o pilak skie on·enggiparang aro poraienggipa chatro-chatrirangna namgipa didianiba ong·jolgen ine ua agandapataha.
Unomiting, College-ni Principal, Dr E.M.Blah-ni rimchaksoani kattarangko agananganio, college-o uamangni dangdike on·ani kamo chu·gimik dakchakanirangko on·anina an·tangni kusi ong·aniko parakatan baksa, a·dokni Education Minister-koba dingtangmancha mittelpilangaha.
