Shillong, Sept 3: Goa-o ong·atanggipa WAKO India Senior National Kickboxing Championship 2021-o Meghalaya a·dokni pal re·ange bakko ra·egipa Jaintia Hills-ni kickboxer-rangko Sukrobar salo, Jaintia Hills-o mande ra·bee rimchaksotokaha. Ia kal·susaanio bakko ra·egipa saksni kickboxer-rangoni sakgittamde medal-rangko chebaaha.
Ia kickboxer-rangko Bouncers Association of Meghalaya-Jaintia Hills (BAM-JH)-ni gita Yingkien Myntdu-o rimchaksoaha aro uamangko rimchaksoanio Jaintia Students Union (JSU) aro dingtang dingtang dolrangba dongpae bak ra·angaha.
Ia kickboxer-rangko rimchaksona gita kan·dike tom·anikoba ong·atangaha aro ia tom·aniko BAM-JH-ni president Y Kynjing dilangenba, ja·mano medal chebagiparangna dingtangmancha mande ra·pilskaaniko dakangaha.
Ia tom·anio JSU-ni president Teiborlang Suchen-ba jinmana aganprakengon, kal·susaanio gisik nanggipa chadamberangko rakbate krengchina didianiko on·angaha.
Ia WAKO India Senior National Kickboxing Championship 2021-o Meghalaya a·dokni pal re·ange bakko ra·egipa manderangara, medal ge·gniko chebagipa Hame Shaniah Suiam, medal ge·prak chebagipa Nisanshwa Lyngdoh aro Bantei Sungoh, Heimonmi Suchiang, Teimiki Sungoh, Pynshrainmiki Rabon aro Mighty Sword Tyngkan ong·a.
