Shillong, April 21: A·songni gipin bakrango gitan, chang 16-gipa National Services Day-ko a·dokni skotong Shillong-oba apsandake Pinewood Hotel-ni Conference Hall-o Sukrobar salo maniangaha jekon salni bako mongsonggipa sokgipa ong·e bakko ra·anggipa a·dokni skotong minister Pa Conrad K Sangma, a·bachengate on·angaha aro ia manianio, a·dokni Chief Secretary D P Wahlang, Additional Chief Secretary, Dr Shakil Ahammad aro kamtangtangoni neng·takgimin IAS officer sakgni, Anil Swarup aro Dr Rakshit Tandon-maangba bakko ra·angpaaha.
Encouraged our officers to continue working as a team with dedicated passion to ensure we not only bring smiles but positive difference in the lives of our people. Thank each of them for their service to our State and our nation. pic.twitter.com/ILbz7mssQz
— Conrad K Sangma (@SangmaConrad) April 21, 2023
A·songo songdonggiparangko bil gnangatani aro dangdike on·ani kamrangko uamangona sokatani ine ia bilsina pangchakaniko done National Civil Services Day-ko manianganiko a·bachengate on·mitingo, skotong minister Pa Conrad K Sangma, jinmana aganprakangengon, tom·anio bakko ra·gipa sakantina namgipa sikanirangko on·angan baksa, a·songna aro a·doktangna pilak on·kanganirang baksa kamtangko dangdike on·enganinaba sakantikon mittelpilangaha.
Miksongani gnang kamrangko ka·e dangdike on·angkuchina gita officer-rangko didiangenba, pilak a·gilsakni mikbokanirangchi namgijaona salangako man·gija manderangna kakket aro bebeo dangdike on·na gita an·tangtangko on·kange kamrangko ka·ode maming chu·sokgijani dongjawa aro miksonga nisanona sokdona gita amchongmotgen aro dingtang dingtang dolrang baksa nangrime aro mande ra·grike, pangchakgrike kamko ka·osa an·chingni ka·na nanggipa kamrangko aro daitangko chu·sokatna gita man·gen ineba skotng minister sakantikon didiangaha.
A·dok sorkarini mikkangchi kamrangko ka·nasienggipani gimin aganangskaengon, a·doko Village Volunteer-rangko donna gita a·dok sorkari mikkangchina chanchie ra·baenga aro songo-noko pilak ong·enggipa obostarangni gimin aro nanggitikgipa a·selrangni gimin jekai chi-bana ong·ani, a·arang be·e ruruani, bijoli wata tik ong·gijani aro chi watarang tik ong·gijani, bank-ni kamrango neng·nikanirangko chagrongani aro ma·manti songoni neng·nikanirangni gimin a·dok sorkarioniko dakchakanirangko man·na gita ia volunteer-rangan u·iatanirangko on·angskagen ine parakatan baksa, Gram Sevak-rangkoba bil gnangdapatani gimin sorkari kamrangko ka·anggen ineba Pa Sangma parakataha.
Iana skang, a·dokni Chief Secretary, D P Wahlang, jinmana aganprakanganio, batanggimin somoirango civil service-ko manderang bang·en matnangtokaha ine aganangskaenba, pilak dakgualnirangko nipilate manderangna kakketo dangdike on·china gita sakantikon didiangan baksa, officer-rang aro manderangni gisepo aro officer-rang aro political-ni gisepo nangrime kam ka·anirang dongna nangani giminba Chief Secretary, sakanti dangdike on·enggiparangna agan-ku·patianiko on·angaha.
