Shillong, Feb 18: Manderangni nanggitikan somoirango dakchakanirangko on•na man•na gita Nationwide Emergency Response System (NERS)/Emergency Response Support System (ERSS) ba Dial ‘112’-ko Sukrobar salo, Meghalaya a•dokni Chief Secretary RV Suchiang, Shillong songjinmani Sadar Police Station Complex-o a•bachengate on•angaha.
Ia NERS/ERSS/Dial 122-ara manderangni nangchongmotan somoirango ‘112’ nombor-ona ka•ate dakchakanirangko ra•na man•na gita India sorkarini ning•o donggipa Ministry of Home Affairs (MHA)-ni a•bachengatgipa chol ong•a aro da•o ia gital Dial 112-ko a•bachengatskaahani gimin pilak emergency nombor-rang jekai police-rangni 100, Fire & Rescue-ni 101, ambulance-ni 108, me•chik aro bi•sarangna simsakaniko on•gipa 181 aro uandakgipa pilak nombor-rangkon ia ‘112’ nombor-o man•chapskagnok.
Meghalaya a•doko ia NERS project-ko a•bachengatna gita a•dokni Home department, bol 8 Maruti Ecco Van-rangko ra•aha aro bol 12 chonchongipa garirangkoba ra•e jakkalchengna ge•etaniko on•aha. Ia garirangko East Khasi Hills a•jana bol 4, West Khasi Hills-na bol 1, Ri Bhoi-na bol 2, East Jaintia Hills-na bol 1, West Jaintia Hills-na bol 2, Eastern West Khasi Hills-na bol 1, South West Khasi Hills-na bol 1, North Garo Hills-na bol 1, East Garo Hills-na bol 2, West Garo Hills-na bol 3, South West Garo Hills-na bol 1 aro South Garo Hills-na bol 1 ka•e sualataha.
