Shillong, May 3: North Eastern Hill University (NEHU)-ni in-campus aro NEHU-ni Shillong aro Tura campus ning•o donggipa college-rang, jekai law college, agriculture college aro uandakgipa college-rango admission ra•na nangenggipa chatro chatrirangde Common University Entrance Test (CUET)-ko sena nanggen ine Mongolbar salo, Meghalaya a•dokni Chief Minister Conrad K Sangma talataniko on•angaha.
Chief Minister-ni parakatani gitade NEHU-ni ning•o law college, agriculture college aro uandakgipa college-rangba donga aro je chatro chatrirangan NEHU-ni Shillong aro Tura campus-ni ning•o donggipa college-rango admission-ko ra•na nangengachim, uandakgipa chatro chatrirangde CUET porikkako sena nangtelaigen.
Indake ong•genchimoba, sorkarini dakchake on•enggipa college-rang aro private college-rango undergraduate course-na admission ra•na nangenggipa chatro chatrirangde CUET-ko sena nangskajawa ine Chief Minister parakataha.
NEHU-o admission ra•na nanggijagipa college-ni chatro chatrirangde mikkang bilsirangoba ia CUET porikkako sena nangjawaha ineba Chief Minister talataniko on•angaha.
Meghalaya a•doko a•dok sorkarini dakchakanichi chalaienggipa college aro private college-rangde CUET porikkako sena nangjawa ine Sombar salo, ma•mongni Union Education Minister Dharmendra Pradhan, a•dokni Chief Minister-na ku•rachakaniko on•atani ja•man, iani bidingo ua talataniko on•angaha.
