Shillong, Sep 22: North Eastern Hill University (NEHU)-o poraienggipa chatro chatrirangni dingtang dingtang dabianirangko chu•sokate on•jaengani gimin Bristibar salo, Khasi Students Union (KSU) NEHU unit-ni membor-rang, Vice Chancellor-ko uni office-o napna on•gija uni office-ko chipe donataha aro uandaken ja•mano dolgnini gisepo ding•chaogrikanirangko nikna man•aha.
NEHU-o poraienggipa chatro chatrirang, skigiparangko chu•onga gita on•china, chatro chatrirangko salrurana gari gorarangko on•china, sanna banani cholrangko on•china, hostel-rangko taridape on•china aro uandake dingtang dingtang dabianirangko dakengachim ine nikna man•a.
Chatro chatrirangni iandake dabianirangko chu•sokate on•chipjaengani gimin Bristibar salo, KSU NEHU unit-ni membor-rang, NEHU-ni Vice Chancellor Prof Prabha Shankar Shukla-ko uni office-o napna on•gija, uni office-ko chipe donatenba, chatro chatrirangni dabienggipani bidingo mikkanggrik agan-talate on•china dabiangtokaha.
KSU NEHU Unit-ni general secretary Shibaitlang Rymbai-ni kobor ra•timgiparangna parakatani gitade, NEHU-ni badiaba badiaba department-rango skigiparang chu•ongjaengani a•selan semester-ko jagni skangan a•bachengahaoba class-rangko man•kujae chatro chatrirang neng•nikanirangko chagrongna nangtokengachim.
NEHU-o chu•onga gita bus garirang dongjani a•sel, bus garirango re•rurana nangenggipa chatro chatrirangde neng•nikanirangko chagrongna nangtokenga ineba Rymbai parakataha.
NEHU-o sanna banani cholrang dongjani a•sel saenggipa chatro chatrirang, NEHU campus a•palonasa re•ange samrangko aro ma•manti sanna bananirangko ra•na nangenga ineba ua parakataha.
Hostel-rangni gimin janapatskaengon, NEHU-ni hostel-rangko nirok sandianirang dongjani a•sel da•o hostel-rangni obostarang namsrangjaengaha ine KSU-ni dilgipa parakatenba, hostel-rango donge poraienggipa chatro chatrirangni namgnina ta•raken ia hostel-rangko tarie on•china dabiangaha.
Indake ong•engon, chatro chatrirangni dabianirangko chu•sokate on•na gita KSU, NEHU-ni Vice Chancellor-na antisa somoiko on•kugen ine Rymbai parakataha.
