24.3 C
Tura
spot_img

Netaji-ni atchiani salko a·songna chuttini sal dake parakchina Mamata, PM Modi-na chitti seata

Must read

Guwahati, Nov 19: India-ko jakgitel man·atna dakgrikdilanio saksa niksenggipa mande Netaji Subhas Chandra Bose-ni atchiani salko dingtangmancha a·song gimikon chuttini sal dake parakatchina gita dabienba, West Bengal-ni skotong minister Ma Mamata Banerjee a·songni Prime Minister Pa Narendra Modi-na chittiko seataha.

A·songko jakgitalatna an·tangko on·kange dakgrikdilbagiparangoni saksa, Netaji Subhas Chandra Bose-ni atchiani salko pangnan bilsianti January jani 23 tariko a·songo aro gipin a·songrango manirongbaienga.

A·songni Prime Minister Modi-na chittiko seatgipao, “Netaji, jean niksenggipa aro dal·batgipa Bengal-ni dedrangoni saksa ong·paa ua, a·songni matgrik, a·songni dilgipa aro skang British-ni sason ka·miting somaio uamangni jakoniko India-ko jakgitelatna re·mikkanganio uni namgipa kamrangchi mande sakantina dakmesokgipa saksa ong·a,” ine West Bengal-ni skotong minister janapataha.

“Pilak chasongrangnan ua namgipa didianirangko on·gipaba ong·a. Uni an·tangko on·kange gisiko nange dilgipani kamo dangdike on·anganio, Indian National Army-ni hajalni-hajal ka·donggipa sipairang a·songtang-chigatangna uamangni gamchatbegipa janggirangko on·kangtokaha,” ineba chittio janapaha.

January 23 tarikko a·songna chuttini sal dake parakatchina West Bengal sorkarini mol·molenggipako be·en pil·atna mamingkon daka dongkuja ine skotong minister Ma Banerjee, uni seatgipa chittio Modi-ko gisik ra·atjolaha. Uni atchiani salko a·songna chuttini sal dake parakatgenchim ong·ode, iandakgipa dal·gipa dilgipako uni chang 125-gipa siani salko gisik ra·e maniangani somaio krae mande ra·aniko dakani gitaba ong·angjolgen ine ua aganaha.

Indake ong·engon, Netaji Subhas Chandra Bose-ni gimaanio nangchape, indakgipa dal·gipa dilgipana maimancha ong·ahachim, uko u·ina sike dongenggipa a·songni aro gipin a·songni manderangni pilak sing·anirangna aro jajaanirangna bon·kamgipa aganchakaniona re·baani gimin nanga gita ja·kurangko de·atchinaba Ma Banerjee, ma·mong sorkario dabijolaha.

Aganani gita, Netaji Subhas Chandra Bose-ko 1945 bilsini August 18 tarikonin nikchipjaha.

Adita sandirikkote nigiparangni a·kangani gitade, ua salo Taiwan a·songni Taihoku-o sildoreng a·sel ong·anio Netaji siangaha, indiba bang·bata uko ja·rikgiparang da·omangba donnue kate donga inesa bebera·engkua.

spot_img

More articles

spot_img
-->

Latest article