Resubelpara, Jan 11: North Garo Hills a.jani Police-rang re.anggipa January 10 tarik Robibar salo ge·chigittam cha·ugimin bikerangko rim·aha.
Ua bikerangko Assam-oniko ra·bae ua bikerangni engine number aro chassis number-rangko taridape Meghalaya-ni dingtang dingtang biaprangona palatengachim.
Koborni gitade, Mendipathar Police Station-ni ning.o donggipa Thapa Darenchi Police Out Post-ni Official incharge Pa Toni M Sangma aro uni dol re·anggipa December 14 tariko cha.ue salbagipa Royal Enfield bike ge.sako man·rikahachim, ua bikeko cha·ue salbagipa manderang, police-rangni sandirikitengko nike gale katangaha.
Ia mamlani bidingo bikeni nokgipako Assam aro Mendipathar Policerang nangrime sandimiting somoio, re·anggipa December 28 tariko Mendipathar Police bike cha·ue Garo Hills-ni dingtang dingtang biaprango palenga ine koborko man·soaha.
Kobor man.soani gimin police-rang re.anggipa December 29 tariko garirangko sandirikitmiting somoio saksa mandeko rim·na man·aha aro rim·a man·gipa mande Assam-oni on·atenggipa gipin manderangni bikerangkosa ra.bae palskaenga ine ku·rachakaha.
Rim.a man.gipa mandeni aganachakniko ma.sirikani gitade Garo Hills-o bike cha.ue palenggipa manderang badiaba dolni dal.dalgipa manderang ba baksa jak donga ine ma.siaha.
Bike cha.ue palenggipa manderang Assam-o dongenggipa manderangni bikerangko cha·ue ra·baenba gital dake taridape palengachim.
Bike cha.uggipa manderang cha.uani ja.mano bikeni chassis number aro engine number-rangko taridape bike ge·sako ge·gni dake tariskaenga, ge·sara bike nokgipa chongmotni registration number aro ge·gipinkoba apsan registration numbero tarie bike nokgipani bimungo lekkarangkoba taridape palengachim.
Cha.ue palenggipa manderangni bikeko ra·na am·gipa ramram manderang internet-oniko bikeni gimin name ma·sina che.em che.em am·sandion bike gital ine ma.sitokenga. Indiba uan kakket ong.ja.
Ia a.selni bidingo policerang Royal Enfield Company-ona re·ange bike nokgipa manchako sandion bike nokgipako ma.siaha aro uni bikekode cha·ujaha ine nikna man.aha, maina bike cha.ue palenggipa manderang chu·gimik bikeni lekkkarangko taridapahachim.
Indakgipa obostarang ong.engon bike nokgiparang an.tangtangni bimungo tarie palenggipa bikerangko ra.pilna am.engachim indiba, policerang court-ona re·ange sing·sandiani ja·manosa on·atgen ine parakatskaha.
Iani bidingo Police-rang ning.tubate am·sandianiko dakengon gipin cha·ugimin bikerangko Tura, Williamnagar, Dadenggre aro A·dokgre jolrangoniko bang·en man·dapaskaha ine parakatenba mikkangchi cha.ugipa bikerangko man·dapangkuna ka·dongenga ine Mendipathar PS-ni Official In-Charge, kobor ra·timgiparangna u·iataha.
Uni gimin je manderangan skatang bike palgiparangko brena skang namedake sing.sandianiko dake brechina mikkrataniko on.ataha.
