New Delhi, Dec 26: Sak 276 India a•songni manderangko salrurabaenggipa, Airbus A340 plane, jekon, niamgri mandeko badingsrukenga ine chanchichipenba France a•songo sal 4-na dondipatahachim, ia plane Mongolbar pringni 4 bajimango, Mumbai-ona sokbaaha.
Indake ia aircraft, Paris a•songni sepango donggipa Vatry Airport-oni attamni 2.30 bajimango re•chakatbaaha. French sorkarini aganani gita de, ia Mumbai-ona re•bagipa plane-o sak 276 songregipa manderang dongachim aro uanoni sak 2 bilsi chu•ungkugijagipa bi•sarang baksana sak 23 manderang, French sorkarini dakchakaniko on•china bi•aha aro French a•songon dongrikaha.
Iani gisepon, sakgni manderangko rim•enba kachario bichal ka•gipani mikkangona ra•angaha ine French kobor ra•timgiparangoniko u•ina gita man•aha.
Vatry Airport-ona sokbahaon, ia plane-o sak 303 India a•songoni songregipa manderang-oni, sak 11 bilsi chu•ungkugija branggipa bi•sarang gnang ine officialrang u•ina gita man•aha.
Indake, jachange dongenggipa manderangna, tuchakani palangrangko, auchakani biap aro paikanarangko tarie on•aha, unbaksana, ia manderangna cha•ani ringanirangkoba, dondikatengmiting somoio on•aha ine nikna gita man•a.
Dubai-oni Nicaragua-ona re•enggipa, Romanian-ni chalaienggipa Legend Airlines-ba Vatry Airport-o neng•takahachim, indake ong•engon, mande badingsrukenga ine chanchipaniko am•sandiako dakengon, ia plane-koba French police dolrang authority-rangni raiko ra•enba, am•sandianiko dakna a•bachengaha.
2023 bilsi gimiko, India a•songni manderangni, United States-ona niamgri napsrukna jotton ka•aniko am•sandie nion, chu•gimik 51.61% ko man•ahaon, batanggimin bilsini percentage-na bataha ine nikna gita man•a. Indake, US-ni Customs and Border Patrol (CBP)-ni am•sandie niani gita de, chang 41,770-de Mexican sima ari gita napbana jotton ka•anian ong•achim. Indake, Nicaragua aro gipin a•songona, songreanio nangnikenggipa documents-oni olgroke songrena man•gipa flight ara, ‘dunki’ flight-an ong•achim ine nikna man•a.
Iakoba poraie nina man·gen: India a·songo Meghalaya sports kal·chakram biap ong·baroroenga: Conrad
Watch
