Shillong, Jan 12: India aro Bangladesh a•songni simarango dingtang dingtang niamrangko ra•gatahani a•sel ia sal somoirango a•song damgnini gisepo bading chiwalgrikenggipa dolrang, neng•nikanirangko chagrongna nangtokenga ine kobor on•aha.
India aro Bangladesh a•songni gisepo ru•uta bilsirangna skangonin bading chiwalgrikanirang a•bachengahachim aro 2020 bilsirangona kingkingde bading chiwalenggipa manderang, an•tangtangni company-ni identity card-rangko mesoke a•song damgnini gisepo re•rurae bading chiwalanirangko dakna man•engkuachim. Indake ong•genchimoba, uni ja•mano a•song damgnichipaknian gital niamrangko a•song damgnini gisepo ra•gatna a•bachengahani a•sel bading chiwalenggiparang re•ruraanirango neng•nikanirangko man•e da•o a•song damgnini gisepo bading chiwalgrikanirang namen tang•onangaha ine kobor on•aha.
India Bangladesh Export Import International Chamber of Commerce-ni general secretary Doli Khongla-ni u•iatani gitade, skangonin a•song damgnini gisepo ma•manti bosturang, jekai ro•ong, ba•ra aro uandakgipa dingtang dingtang bosturangko altue bading chiwalgrikna man•ani gimin bading chiwalgrikanirang namen chu•sokgipa ong•engachim indiba da•o a•song damgnion rakgipa niamrangko ra•gatahani a•sel bading chiwalgiparang neng•nikanirangko man•e bading chiwalanirangba namen tang•onangaha.
Skango gitan a•song damgnini gisepo apsan niamrangko ja•riktaipilgenchimode a•song damgnini gisepo bading chiwalgrikanirang tang•doangpiltaigenchim ineba Khongla parakataha.
