Baghmara, Feb 10: A•doko nichanggalako man•enggipa jolrangko NPP nichanggaljaenga, South Garo Hillsni namroro-silroroanina, dingtang dingtang rika-cho•anirangna chinga mikpakma nie kam ka•enga ine skotong minister Conrad K Sangma aganaha. Baghmarani Captain Williamson Memorial Collegena rikenggipako niani ja•man, tom•dakgipa manderangna aganengon, College nok rikna tangka gong kror 12 chi dal•bate nokko rikna man•gnok aro wilwilao dongenggipa manderangna namgni ong•gnok aro jolni lekka-porako tang•doatna dakchakani ong•gnok ineba skotong minister aganangaha.
Jinmana aganprakengon, Baghmarani manderangna nangchongmotgipa ringani chirangko nokantiona sokate on•aninaba water supply schemeko district-o a•bachengatman•aha aro rama-jal•angrangko tarianioba kamrangko ka•engjok ineba aganangaha.
Siju-Rongarani MLA Rakkam A Sangma-ba, South Garo Hillsna nichanggalgija kam ka•enganina sorkariko mittel-mitchue aganangaha.
Uni ja•man skotong minister dingtang dingtang producer grouprangkoba grongangjole uamangna tangka gong kror 1.1 ko producer group 6 na sualangaha.
Game ge•e cha•giparang FOCUS ingipa programoniko sud gri tangkarangko srona man•gen jekon sorkari manderangni namgnina ia cholrangko on•enga ineba talatjolangaha.
