Shillong, May 20: Nongpoh Civil Hospital-o rikenggipa Oxygen Plant-ko Bristibar salo, Meghalaya a·dokni Chief Minister Conrad K Sangma nieaha.
Ia Oxygen plant-o minute-prako litre 150 oxygen-rangko chipna man·gen aro ia oxygen plant-ko chalaina a·bachengahaode ge 25 palangrangna chu·onga gitan oxygen-ko on·na man·gnok.
Ia oxygen plant-ko UNDP-ni dakchakanichi rikenga aro ia apsan dakgipa oxygen plant-kon Tura aro Jowai-oba rikenga.
Ia oxygen plant-ko rikani kamrangna an·tangni chu·ongnikaniko parakatengon, ia oxygen plant-ko mikkang antionide a·bachengna man·gnok ine Chief Minister parakataha.
“Chinga bosturangko man·soe da·o ia oxygen plant-o chatengaha indiba nokni ning·ao chinga pipe-rangko tekna nangkuengani giminsa adita somoirangko nangkugen. Indake ong·genchimoba chinga ia oxygen plant-ko mikkang antiode matchotate a·bachengna ka·dongengaha,” ine Chief Minister parakataha.
Nongpoh Civil Hospital-ona re·angani somoio a·dokni Chief Minister, Umran Niangbyrnai-o donggipa Maternity & Child Hospital-o Covid centre-ko kuliani giminba official-rang baksa chanchirimangjolaha.
“MCH-o TATA Trusts dolni gita oxygen plant-ko rikna tik ka·manaha aro chinga uamang baksa iani bidingo agangrikjringenga,” ine Chief Minister parakataha.
Meghalaya a·dokni pilak biaprangon sanchakgipa biaprangko taridapna sorkari rake kamko ka·enga ineba Chief Minister parakataha.
“An·chingni a·dokoba COVID-19 batrikrikengani gimin an·ching an·tangtangko name tarisona nangenga. Ri Bhoi a·jaba a·dokni nakuram ong·ani giminba namen kenchakna nanggipa biap ong·a,” ine Sangma parakataha.
