Shillong, March 11: Nongpoh Civil hospitalo rikenggipa trauma centre 75% mangni gitade matchotaha indiba da•odipet uko covid centre gita jakkalengkua ine sukrobar salni assembly tom•ao Lahkmen Rymbui u•iataha.
Congress doloni a•rikalako man•gipa Nongpohni MLA Mayral Born Syiemni sing•anina aganchakengon, ia bilsini gisepon ia trauma centreko rikaniko matchotatgnok aro jakkalna man•gnok ine Rymbui aganchakaha.
Iako rikanina chu•gimik koros ong•aniara tangka gong kror 3.6 ong•a, unoniko lak 2.40 tangkarangko bosturangko breanina, lak 2 ko re•a-doanina aro 60000/- ko gipin kamrangna jakkalaha.
Tanggitik a•sel ong•giparangna dakchakaniko on•a aro ia national highway-40-o a•sel ong•anirangko bang•en nikna man•engani gimin ia centreko nangchongmotenga. Jakkalgija aro taria matchotgija donchipenggipa ia trauma centreko bakbakan a•bachengatna man•ode nambegen maina ian ia jolo nangchongmotgipa ong•enga ineba Syiem aganaha.
