Shillong, April 17: Shillong songjinmao Space center dongani gimin salgro salaram a•dokrango Shillong songjinmaan space technology-ko tang•doatna mongsonggipa kamko ka•gen ine Sombar salo, Shillong-o G20 tom•aniko ong•atna kamrangko ka•dilgipa Amitabh Kant parakataha.
Brigipa Space Economy Leaders Meeting (SELM)-na precursor ba opraksamsoani bak gita Shillong songjinmani Courtyard Marriot Hotel-o G20 tom•aniko ong•atanio, kobor ra•timgipa manderang baksa agangrikengon, ma•mong sorkari dingtangmancha niamrangko ra•gatahani gimin India a•songo space sector-rangko a•bachengatna gita bilakbatataniko on•ani ong•gnok ine Kant parakataha.
Ia precursor tom•aniko ong•atanio maikai a•songrangko namdapatna gita space economy-ko jakkalgen aro maikai space-ni bilko dingtang dingtang kamrangna jakkalgen, uarangni gimin chanchirimanggen ineba Kant parakataha.
G20 a•songrangni gisepo ku•cholsan ong•e kam ka•aniko nangchongmota ine janapatengon, India a•songo ISRO-an space-ko dilgipa ong•e ia pilak kamrangon mongsonggipa kamko ka•gipa ong•a aro ia tom•anio chanchirimaniko uamangan dilenga ine Kant parakataha.
