Shillong, Nov 03: Ia jani gisepo North East Olympic Games 2022-ko a·doko nambee soka-chakna man·na gita pilak tarisamsogimin kal·chakram biaprangko aro kal·susaaniko soka-chakanio mongsong nangchongmotgiparang pilakko a·dokni Sports Minister Pa Banteidor Lyngdoh, Bristibar salo nirokangaha.
Sports minister, a·dokni skotongo donggipa niksenggipa Jawaharlal Nehru Stadium-ko nirokanga baksana NEHU-ni SAI complex-koba niangjolaha. Indake nikatna gita man·gen, chong·motan batanggimin somoio a·dokni skotongo Meghalaya Games-ko soka-chakangao kal·susaanio bakko ra·egiparangna turam-tutipko on·gipa biapni sel·tagijanirangko aro paikanarangni rongtalgijaniko social media-o manderangni watroroatani ja·man JN Stadium-ko skotong minister an·tangan biapona re·ange nirokena gita nangpilahanichi aditan niksengangahachim.
Iandakgipa obostarangchi niksengako man·taijana gita, a·dokni sports minister ianpakode ia kal·susaaniko soka-chakanina mongsong nanggiparangko tarisamsoatenggiparangko an·tangan re·ange nirokangaha.
A·doktangko man·aoni chu·gimik bilsi 50 gapaniko maniengani bak gita Meghalaya a·doko 2-gipa bakni North East Olympic Games-ko ia November jani 10 oni 16 tarikona soka-chakanggen.
Bilsi-bri prako changprak ong·atenggipa a·joltangni kal·susaaniko re·anggipa 2018 bilsio Manipur a·doko soka-chakchengaha. Ia Olympic Games-o ming 18 dingtang dingtang kal·susaatanirangko ong·atnasienggipao sak 3000 na baten kal·susagiparang bakko ra·angtoka baksanaba officialrang aro gipin niksenggipa manderangba bakko ra·angtoknasienga ine koboro janapataha.
