Tura, Sep 21: Budbar salo, Meghalaya a•dokni Chief Minister Conrad K Sangma, Assembly-ni Deputy Speaker Timothy D Shira, Kharkutta-ni MLA Rupert Momin aro Bajengdoba-ni MLA Pongseng Marak-ni dongpaanio, seokako man•gimin manderangna FOCUS+ card-rangko North Garo Hills a•jani Kharkutta-o suale on•angaha.
Ia FOCUS+ program-ara, Producer Group (PG) dolantini member sakprakna gong 5000 ka•e dakchakaniko on•na NPP-chi dilenggipa MDA sorkarini a•bachengatgipa program ong•achim aro ian a•doko game ge•e cha•enggipa manderangko dakchakna sorkarini ra•gatgipa FOCUS program-ni apaldapatgipa program ong•achim.
FOCUS program-ni ning•ode producer group dolprakna gong 5000/- ka•e on•achim indiba ia FOCUS+ program-ode producer group dolantini member sakpraknan gong 5000/-ko on•e sorkari dakchakanirangko on•dapskaenga.
Ia FOCUS+ card-rangko suale on•angani somoio a•dokni Chief Minister, jinmana aganprakangengon, ia program-ni ning•o game ge•e cha•giparangna sorkari dakchakanirangko on•angkugen aro iana gong crore 250-ko bilsio chamgen ine parakataha.
Ian FOCUS+ program-ni gnigipa bilsi ong•engaha aro ia program-ni chu•sokgipa ong•enganiko nike a•dok sorkari, ia program-ko komibeoba bilsi 10-na jako ra•angkuna tik ka•aha ineba Chief Minister parakataha.
FOCUS program-ni ning•o gama ge•ani kamrangna tangka paisarangko chamenganichi game ge•e cha•enggipa manderangni janggi tanganio dingtanganiko nikna man•gen ineba ua aganaha.
Chief Minister-ni parakatani gitade, FOCUS aro FOCUS+ program-ara Meghalaya a•dokni itihaso dal•batsranggipa program ong•enga.
Budbar salo Kharkutta-o ong•atanggipa program-ara da•o dipet ia jolo sorkarini dal•batsranggipa program ong•enga ineba Chief Minister parakataha.
