Shillong, Feb 8: Meghalaya a•doko Congress dolba, National People’s Party (NPP)-chi dilenggipa Meghalaya Democratic Alliance (MDA)-o bakrimaniko on•angaha aro uandaken India a•songo Meghalaya a•dokan BJP aro Congress dolrangni apsan bakrimchenggipa a•dokba ong•aha.
Mongolbar salo Meghalaya a•dokni Congress Legislature Party (CLP), dingtangmancha MDA-o bakrimna segipa chittiko a•dokni Chief Minister Conrad K Sangma-na on•eaha aro ia chittio CLP-ni dilgipa Ampareen Lyngdoh baksana Congress dolni gipin MLA-rang, chong•motan Mayralborn Syiem, Mohendro Rapsang, Kimfa Marbaniang aro PT Sawkmie-ba soi ka•aha.
A•doko songdongenggipa manderangni namgnina a•dokko re•mikkangdilanio sorkarini jakrangko aro chanchirimanirangko mangrakbatatna gita Congress dolba MDA-o bakrimenga ine ia chittio CLP-ni dilgiparang parakataha.
Chief Minister-ko grongeani ja•mano kobor ra•timgiparangna talatangengon, saksa sakgipinko dakchakgrikna gitasa uamang MDA-o bakrimna tik ka•aha ine Congress MLA-rang parakataha.
India a•songni darang biaprangon Congress aro BJP dolrangni apsan dolo nangrimaniko nikna man•kujachim indiba da•o Meghalaya a•doko BJP aro Congress dolgnian MDA sorkario apsan ong•skaengahachim.
“Ia somoio chinga saksa sakgipinko dakchakgrikna nangao ga•akenga aro manderangni jako seokako man•gimin dilgiparang ong•e chinga an•tangtangni constituency-na aro an•tangtangni manderangni namgninasa ia ja•kuko de•aha,” ine CLP-ni dilgipa Ampareen Lyngdoh parakataha.
A•dokni Chief Minister aro Deputy Chief Minister baksa tom•e agangrikanio CLP-ni dilgiparang, Assam aro Meghalaya a•dokni simarango meligrikna man•jaenggipa biaprangni giminba agangrikangaha.
