Manipur, Feb 4: Manipur a⋅doko Assembly-na lekka puonsusaani ong⋅engon, Meghalaya a⋅dokni skotong Minister aro NPP dolni Padot Pa Conrad Sangma, Churachandpur Constituency-o jinma tom⋅anio aganprakengon, NPP dolan Manipur a⋅doko bang⋅bate seatrangko man⋅e sorkariko rikgen ine agansoaha.

Chinga bang⋅a manderangni gisik on⋅aniko aro NPP dolchi a⋅dokko rikaniko nangnikenganiko manderangni gisiko nikaha. NPP dol Manipur a⋅dokni bidingo rongtalen ma⋅sia maina chinga a⋅doko chadamberangni neng⋅nikanirangko ma⋅sia. Manipur a⋅dok a⋅songo mongsonggipa a⋅dok ong⋅gnina cholrang gnang , ian changsamangmang election-chi aro political dolni tom⋅bimonganichi bimang pil⋅aijawa indiba ian songdong a⋅chagiparangni daitoko ma⋅sianichi aro namgipa dilgiparangko joltangna seokanichisa be⋅en pil⋅na man⋅gen ineba Pa Sangma tom⋅anio aganprakaha.Chingni NPP dolni niksamsoanian salgro salaram a⋅dokrangko silroro namroroatna aro man⋅e dangge cha⋅ani gadangko ra⋅dona nikjumangsoanian ong⋅enga. Ia Assembly-na 60 seat-na sak 42 candidate-rangko on⋅aha aro an⋅chingni seoke susaenggipan chegen ine ka⋅dongatani kattarangko knatimnenggiparangna agandapaha.