Tura, March 2: Da·omiting a·doko sasono ong·enggipa NPP dol, re·baenggipa April jani 9 tariko GHADC-na pu·onataniko ong·atangnasienggipao doloni susagnigipa bangki aro bon·kamgipa candidate-rangni bimingrangko Mongolbar salo parakataha.
Susanakenggipani bimingrangko parakatgipao gimik sak 13 mang baksana ong·katangenggipa Chief Executive Member aro West Garo Hills a·jani Rochonpara constituency-oni Pa Dipul R Marak-koba man·chapataha.
Indake ong·genchimoba, da·omiting MDC ong·e niksenggipa aro executive member ong·e da·o GHADC-o finance portfolio-ko jako ra·enggipa Pa Sengnal N Sangma-ko uni susae chebagipa Wagesik (Baghmara) seat-oniko ra·galskaenba uni palo sakgipin agittal mikkang Pa Bartholomeo D Shira-ko seokskaaha.
Pa Sengnal, batanggimin 2015 bilsio ua apsan constituency-on Congress dolni bilake susarimgipa Pa Freederson Sangma-ko amataha aro ua somoio skotong minister Dr Mukul Sangma-chi a·dokko sason ka·genchimoba warachakgipa NPP dol, council-o sasonni bilko jako ra·angskana cholko man·aha.
Rochonpara seat-na CEM Pa Dipul Marak-ko ianpakba man·chapata baksana NPP-ni nisanchi susaangna gita seokako man·angpagiparangara — Barengapara (Dalu)-na Pa Nasser R Marak, Babelapara-na Pa Rakesh A Sangma, Amongpara-na Pa Panseng R Marak, Boldamgre-na Pa Thebalson Arengh, Betasing-na Pa Premish Sangma, Asanang (Rongram)na Pa Anseng A Sangma, Balachanda-na Pa Enamul Haque, Batabari-na Pa Roynath D Sangma, Shyamnagar-na Pa Tarif Ibrahim Sarkar, Bolsong (Bajengdoba)na Pa Crozier G Momin aro Kharkutta-na Pa Edbirth D Shira.
Pa Roynath D Sangma-ra MDC gitcham ong·a baksana MDC-na seoktaia man·aoni da·o ong·katangenggipaba ong·a, indake Pa Tarif Ibrahim Sarkar-ara minister gitcham Manirul Islam Sarkar sagini depante ong·skaa.
