Myanmar, May 18: Mocha Balmanduri-chi bilakbee su·pekangako man·eming duko ga·akenggipa Myanmar a·songni manderangna dakchakaniko on·na gita nanga bosturangko gate re·chakatanggipa Indian Navy-ni dal·gipa jahas bolgittam Shivalik, Kamorta aro Savitri, Myanmar a·songni skotong Yangoon -ona gipinrangna skang sokangsoaha ine External Affairs Minister Dr. S Jaishankar, Bristibaro parakataha.
Ia Operation Karuna-ni ning·o Myanmar a·songni manderangna pilak naljokanirangko aro dakchakanirangko on·na gita, Indian Navy kang·kare kaenba balmanduri ta·rakanganichi duko ga·akenggipa songsul a·songna nanga gita dakchakaniko on·na jakkoba snilatchengaha.
