Shillong, Feb 10: A·dokni skotong minister Pa Conrad K Sangma aro dakchakgipa skotong minister Pa Prestone Tynsong adita salna skang a·songni skotong Delhi-china doange dingtang dingtang ministerrangko grongani ja·man da·al Butbar salo Union Home Minister Pa Amit Shah-ko grongaha.
A·dokni pilak neng·nikanirangko janapan baksa uana dingtangmancha nirokataniko nangenganirangko uamangni janape agananganiko Home minister-ni namen knatime ra·rikaniko skotong minister parakangaha.
Meghalaya Residents’ Safety and Security Act (MRSSA)ni gimin unbaksa chanchirimango, Ministry of Home Affairs (MHA)ni officialrang aro a·dok sorkarini gisepo ia mamlao ning·tubate chanchirimaniko dakangkuchina agan-ku·pattiatan baksa iana nambatgipa chol-ramako man·adipet sandiangkuchina gita uamango mol·molataha ine skotong minister agan-talataha.
Batanggimin somoio HM-ni Shillong songjinmaona wenbao, ILP-ko dabienggipa organisation-rangni, somoirang chu·ongjani a·sel uko grongrikna man·gijaniko skotong minister-ni janapjole agananina, iani gimin agan-chanchirimna gita uamangko Parliament-ona re·bachina HM agan-ku·pattiaha ine skotong minister talataha.
Indake ong·engon, NEC-ko bimang ong·dapatani bidingo agan-chanchirimna re·baenggipa March jani gisepon ua, Shillong-ona salgnina re·bana tik ka·ataha aro ua somoion dingtang dingtang organisation-ni dilgiparangkoba grongbajolna gita somoiko ra·gen ineba a·dokni dilgiparangna talate on·angjolaha
Salni tom·anio, a·songgipinchini napdrabaenggipani giminba HM chanchirimao naataha, jean ia neng·nikanide Meghalaya mangmangosan ong·aija, salgro-salaram aro a·song gimikchin ong·enga ine talate on·anganio, Meghalaya aro salgro-salaram a·dok gimikni dakbewal-rikbewal, ku·sik aganani iarang pilakkon je cholchiba ua an·tango bil donga kakket chelchakanggen ine HM, a·dokni dilgiparangna ka·dongataniko on·aha.
Iarangna agreba, sima-ari jolrango pakma ba fencing kaatani bidingo neng·nikaniko chagrongengani giminba uamango gisik ra·atjole, iako nirokatna nangenga baksana kamrangko gong·rakatna nangengani gimin HM-ni talatanio, mitam biaprango uana kamrangko ka·chakatna man·kujaengani gimin janape, iako jako ra·e kamko ka·enggiparang baksa agangrike man·adipet kamrangko gong·rake matchotatchina gita a·dok sorkariko mol·molangjolaha.
