Tura, Sep 1: Meghalaya a•dokni gitcham Chief Minister aro Lok Sabha-ni gitcham Speaker Purno Agitok Sangma-ni chang 75-gipa atchiani salko Bristibar salo, a•songni dingtang dingtang a•dokrango maniangtokaha.

Meghalaya a•doko National People’s Party (NPP)-ni dingtang dingtang bipekrang, uni atchiani salko maniangengon, Sangma sagini Tribal-rangna, komibatgipa jatrangna aro songsalni bilgrigipa manderangna on•gilanirangko gisik ra•angtokaha.

Tura-o NPP-ni national president aro Meghalaya a•dokni Chief Minister Conrad K Sangma baksana Tura-ni Lok Sabha MP Agatha K Sangma, PA Sangma sagini gopramona re•ange dingtangmancha una mande ra•pilskaaniko dakangaha.

Iani ja•mano, NPP-ni dilgiparang Tura-ni District Auditorium-o dingtangmancha tom•aniko ong•atenba, Sangma sagini kamrangko gisik ra•e una mande ra•pilskaaniko dakangaha. Ia tom•anio dingtangmancha PA Sangma sagini atchiani salko maniani bak gita NPP-ni dilgipa Conrad K Sangma aro gipin dilgiparang, cake-koba rataha.

Ia tom•aniko ong•atanio NPP-ni national president aro Meghalaya a•dokni Chief Minister Conrad K Sangma, jinmana aganprakangengon, PA Sangma sagini mingnamgipa kamrang pangnan dongkamjringgen ine parakangaha.

Manderangni namgnina kamko ka•anian skanggipa daito ong•a ine PA Sangma sagi, an•tangni janggi tanganio dakmesokaha ineba Conrad aganaha. Salgro salaram jolni manderangna aro a•songni gipin Tribal-rangna ku•rang on•pana cholko on•na gitasa PA Sangma sagi, NPP dolko bikotaha ineba ua aganaha.

Conrad-ni parakatani gitade, salgro salaram jolni ku•rangko on•enggipa NPP dolni da•o national party-rangoni dolsa ong•paenganiara PA Sangma sagini niksamsogipa jumangan ong•achim.

PA Sangma saksa ramramgipa aro bamani gnang dilna changgipa mande ong•e unbaksa kam ka•rimgipa aro uko jegalgipa manderangni namnikanikoba man•aha ineba a•dokni Chief Minister parakataha.

PA Sangma sagiko saksa didina changgipa dilgipa ine toe janapatengon, uni rakbee kamko ka•ani a•selsa da•alo salgro salaram jolrangko, Meghalaya a•dokko aro mongsongbate A•chik jatni ong•aniko India a•song aro a•gilsakni gipin bakrangoba ma•sitokna a•bachengaha ine NPP-ni national president parakataha.

Indake ong•engon, PA Sangma sagiko uni kamrangna mittelpilskana gita uni chang 75-gipa atchiani salko aro uni janggi tanganiko gisik ra•e manichina gitaba Conrad, tom•anio bak ra•giparangko didiangaha.