Tura, Nov 17: Bristibar pringo, Meghalaya a•dokni Chief Minister Conrad K Sangma, Garo Hills-ni ning•o seokako man•gipa dingtang dingtang songrangna aro manderangna Payment for Ecosystem Services (PES)-ni cheque-rangko, Tura-ni District Auditorium-o suale on•angaha.
PES-ni cheque-rangko suale on•angani somoio a•dokni Chief Minister, jinmana aganprakangengon, chengonin samtangtango ong•telaigiparangko songni nokni manderangan nirok sandienggiparang ong•a aro ia bilsio buring bolgrimrangko aro samtangtango ong•telaigiparangko ripinge rakkina gita Green Meghalaya scheme-ni ning•o gong crore 50 tangkarangko chamaha ine parakataha.
250+ villages from across Garo Hills region received funds totaling ₹6 Crores from the Green Meghalaya Scheme.@byadavbjp @moefcc pic.twitter.com/bwzb8qnHQY
— Conrad Sangma (@SangmaConrad) November 17, 2022
Samtangtango ong•telaigiparangko aro buring bolgrimrangko ripinganio songni nokni manderangna tangka paisani gita dakchakanirangko on•na a•dok sorkari, dingtangmancha Green Meghalaya scheme-ko a•bachengataha aro ia tangka paisarangchin songni nokni manderang, buring bolgrim, chiring chibisik aro uandake samtangtango ong•telaigiparangko ripinge rakkiskana man•gen ineba Chief Minister aganaha.
Ia scheme-na Community-Led Landscape Management Program-ni ning•o World Bank-ni gitaba tangka paisarangko dakchake on•enga ine janapatengon, komibeoba hectare 5-mangni gita buring bolgrimrangko man•chapgipa a•ani nokgiparangna, uamangni a•a dal•a dal•jani kri bilsi 5-na tangka paisani gita dakchakanirangko on•gen aro da•alo Garo Hills gimikoni dam 298-mangni gita songrang gong crore 6-mangni gita tangka paisarangko man•aha ine Chief Minister parakataha.
