Tura, Sep 23: Raksamgre Sub-Division-ni ning•o donggipa Pedaldoba Government Aided Secondary School-ni gital nokko Sukrobar salo, Meghalaya a•dokni Chief Minister Conrad K Sangma, Williamnagar-ni MLA Marcuise Marak aro Raksamgre-ni gitcham MLA Limison Sangma-ni dongpaanio nokdonggae on•angaha.
Ia gital skul nokko nokdonggae on•angani somoio a•dokni Chief Minister, jinmana aganprakangengon, a•doko skul nokrangko namdapatna gita sorkari, kang•kare kae kam ka•engkua ine parakangaha.
Bi•sarangni namgnina aro a•doko namroro silroroaniko ra•bana gita sorkari, Meghalaya a•dok gimikon skul nokrangko namdapatna rake kamko ka•enga ineba ua aganaha.
Ia skul nokko Asian Development Bank (ADB)-ni Supporting Human Capital Development-ni ning•o gong crore 1.47 koros ong•e rikahachim aro ia skul noko science lab, digital learning classroom aro uandakgipa gipin cholrangkoba donataha.
Ia apsan salon ua, gong crore 2.09 koros ong•e rikgipa Raksamgre Higher Secondary School-ni gital nokkoba nokdonggae on•angjolaha.
