Tura, May 10: Pekatgipa samko badingenggiparangni kosako rakgipa ja·kurangko de·atenganio, mija Mongolbar walo rama tong·sao dongsoe sandiataniko dakenba, North Garo Hills a·jani police, Tura-oni sakgittam manderangko dingtang dingtang biaprangoniko rim·aha.
Koborko on·ani gita, attam 7 bajimango Assam, Paikan samba, Krishnai-oniko pekatgipa bosturangko Tura-chipakna ra·baengani kakketgipa koborko North Garo Hills police-ni ning·joljol man·soanio pangchake, a·jani mongsonggipa biaprango police-rang dongsoenba sandianiko dakataha. Uandake, attam 8 ata bajimango, Bajengdoba police station a·palni rama dilmongo dongsogipa police naka dol, Tura, Balading-oni saksa Sreitusha Ricadro Ch Sangma-ko rim·e uni ra·baenggipa gram 5.69 ong·gipa heroin baksana ge·sa mobile phone-ko uoniko sekaha.
Ua apsan walni 10 bajimango, apsan police dolan motorcycle-o re·baenggipa sakgni manderangkoba rim·aha aro uamangni ra·baenggipa gram 3.13 ong·gipa heroin-ko, ge·sa mobile phone baksana uamangni salbagipa bike-koba sekaha.
Rim·ako man·giparangara, Tura, Eden Bari Masumatagittim-oni Chuang Ch. Marak aro Cherangre-oni saksa bilsi 25-ong·gipa Ricky Ch Momin ong·e ine ma·sina man·aha. Indake ong·engon, iamang sakgittamni kosako, Bajengdoba Police Station-o mamlako segatangaha ine koborna parakataha.
