Shillong, Nov 3: Meghalaya a•dokoba petrol, diesel aro Liquified Petroleum Gas (LPG)-ni damrang tang•dorikrikengani a•sel ramram manderang neng•nikanirangko chagrongna nangtokengani gimin Budbar salo, Meghalaya Joint Council of Trade Unions & Associations (MJCU&A) aro All India Trade Union Congress (AITUC) Meghalaya State unit, apsan tom•aniko ong•atenba, petrol aro diesel-rangni dam rakbatroroengani gimin jegalanirangko dakangaha.
Ia tom•anio MJCU&A-ni president MN Bhattacharjee, jinmana aganprakengon, petrol aro diesel-ni dam tang•dorikrikengani a•selan manderangni salantio nangchongmotgipa bosturang aro me•su samjakrangni damba rakbatroroskaengahani a•sel ramram manderangsa neng•nikanirangko chagrongna nangtokenga ine parakataha.
Association-ni parakatani gitade, ia bilsini October 1 tarikosan Shillong-o petrol-ni dam gong 97.11 ong•engachim indiba October 31 tarikon petrol-ni dam gong 104.12-ona tang•doange, November 1 tarikode gong 104.91-ona tang•doangskaahachim. Apsan daken diesel-ni damba October 1 tariko gong 89.03 ong•kuengpitichim indiba October 31 tarikon gong 97.76-ona tang•doange, November 1 tarikode gong 97.44 ong•skaaha.
Petrol aro diesel-ni dam tang•dorikrikengani a•selan Shillong-o cha•ani toba bilsisani gisepon changgni dam tang•doaha ineba MJCU&A parakataha.
Bhattacharjee-ni parakatani gitade, ia bilsini July jaosan Shillong-o cha•ani toni dam gong 235 ong•kuengachim indiba September jani gisepon cha•ani toni dam gong 265-ona tang•doangaha.
Petrol, diesel aro LPG-ni damrang tang•dorikrikengani a•selan manderang aro mongsongbate chatro chatrirang aro songni nokni manderang re•a doanirangoba neng•nikanirangko man•tokna nangengaha ine AITUC-ni president T Sangma parakatskaaha.
Iani bidingo ia dolgni NGO-rang, a•dokni Chief Secretary Rebecca Suchiang-na dingtangmancha memorandum-koba on•angjolaha aro damrangni tang•dorikrikenganiko nirokatchina didiataha.
