Shillong, Oct 22: Petrol, diesel aro LPG-ni damrang rakbatroroengahani a•sel ramram manderangsa neng•nikanirangko chagrongna nangtokengani gimin Sukrobar salo, Hynniewtrep Youth Council (HYC) dolni gita, nisan gisimko ra•e Shillong songjinmani dingtang dingtang biaprango jegale re•jomaniko ong•atangaha.
Jinma re•jomaniko Motphran-oni a•bachengate Khyndai Lad (Police Bazar)-o matchotataha aro ia re•jomanio bakko ra•anggipa manderang, BJP-chi dilenggipa ma•mong aro a•dok sorkarini kosako jegalanirangko dake re•jomangtokaha.
Sukrobar salona kingking East Khasi Hills a•jao petrol-ni dam gong 101.72 aro diesel-ni dam gong 94.19 ong•engahachim. LPG-ni damba Shillong songjinmaode gong 967 gapahachim.
Ia jegale re•jomaniko ong•atani bidingo HYC-ni general secretary Roy Kupar Synrem, kobor ra•timgiparangna talate on•angengon, petrol aro diesel-ni damrang tang•dorikrikenganiara gari gorarangko jakkalenggipa manderangnasan ong•aigija game ge•e cha•enggipa aro re•na dona gita jinmani garirango songre songgabatpaenggipa manderangnaba neng•nikanirangko ra•baengaha ine parakataha.
Da•o dipet Meghalaya a•dokona manderangni nangchongmotgipa bosturangkoba garirangosa ra•baengani gimin petrol aro diesel-ni damrang rakbatengani a•sel manderangni nangchongmotgipa bosturangba tang•doanggnok ineba ua aganaha.
Synrem-ni parakatani gitade, Meghalaya a•doko COVID-19-ni a•sel ramram manderang aro game ge•e cha•enggiparang bang•a neng•nikanirangko chagrongna nangaha aro da•o petrol, diesel-rangni damrang tang•doahani a•sel pilak bosturangni damba rakbatna siengahani gimin manderang neng•nikanirangko chagrongna nangbatgnok.
Ma•mongo excise tax agre rakdugaengani a•selsa iandakgipa toni damrang bariskaengaha ine janapatengon, iani bidingo ma•mong sorkari baksa agangrikchina gita didie HYC, a•dokni chief minister-na sedoataha ine Synrem parakataha.
Meghalaya a•doko petrol aro diesel-ni kajinarangko hisapode salgro salaramni gipin a•dokrangna bate namen komibata indiba ma•mongo salantian kajinako bariatengani a•selsa iandakgipa neng•nikaniko chagrongna nangskaenga ineba ua aganaha.
