Shillong, June 10: India a•songni dingtang dingtang a•dok aro Union Territory (UT)-rangna Union Education Ministry-ni tarigipa Performance Grading Index (PGI) 2019-20-o a•song gimikni gitan lekka porako on•anio chu•sokgijaniko nikna man•aha indiba apsan somoion ka•sine namrorobaanikoba nikna man•skaaha.
Ia PGI report-o Meghalaya a•dok 1000-oniko 649 mark-rangkosan man•e bon•kamgipani gnigipa biapko man•aha aro uni ja•man 545 mark-rangko man•e Ladakh bon•kambatsranggipa ong•aha.
Meghalaya a•dokko skango, salgro salaram jolo education ba bida budi on•chakgipa biap inesa mingsing minggamachim indiba da•o salgro salaram jolo damsni a•dokrangni gisepo bon•kamgipasa ong•skaaha.
Meghalaya a•dokna on•gipa mark-rangko nie bang•bata manderang Meghalaya a•doko lekka porani namen komienga ine agantoka indiba name nigenchimode ia mark-rangara lekka porani gadangko mesokani ong•ja ine nikna man•a. Gipin a•dokrang baksa tosusae nigenchimode Meghalaya a•dokan mitam a•dokrangna bate nambatenga ineba nikna man•a.
Skie ra•anio Delhi aro Puducherry a•dok damgnian 124 mark-rangkosan man•aiaha indiba Meghalaya a•dokde 126 mark-rangko man•skaaha.
Governance ba chalaiani bewalrangoba Meghalaya a•dok 197-kode mark-ko man•aha indiba Chattisgarh 169-ko, Nagaland a•dok 174-ko aro Ladakh 76 mark-rangkosan man•aiaha.
Ia report-o parakani gitade, PGI score-oba Meghalaya a•dok 5 percent-chi 10 percent-ona namdapataha.
Ia report-o Meghalaya a•dokni komibate mark-rangko man•ani a•selara skie on•chakgipa biaprangna 150, equity-na 230 aro governance process ba chalaiani bewalna 360-ko man•ani a•selsa ong•aha aro ia gadangrango maini a•sel Meghalaya komibate man•aha uko ma•sina gitade ia gadangrangko ma•sichengna nanggen.
Uni gimin Meghalaya a•dokni mark-rangko name nigenchimode lekka poranio ja•manchakengani gimin komie man•a ong•ja indiba dingtang dingtang gadangrangko toe komie man•anisan ong•aia ine nikna man•a.
Re•anggipa bilsi baksa tosusae nigenchimode ia chango Meghalaya a•dok tang•dobataha ineba nikna man•a indiba salgro salaramni gipin a•dokrang aro a•songni gipin biaprangko srapna gitade kamrangko rakbate ka•skana nangao ga•akenga aro uan mongsongbate gital chasongni ostro (digital)-rangchi skie on•ani aro skie on•chakgipa biaprangko namdapatanian ong•enga.
Ia report-o skigiparangni aro chatro chatrirangni attendance, gital chasongni ostro (digital learning aid)-rangko jakkalani, smart classroom, computer aro internet baksana dingtang dingtang cholrangni gadangko nibataha.
2017-18 bilsio Meghalaya a•dok grade VI-o ong•achim aro ia gadangko 2018-19 bilsio grade V-ona ra•doe 2019-20 bilsioba apsan gadangkon ra•angkuaha.
Indake ong•engon, PGI-ni report-ko Meghalaya a•dokni Chief Minister Conrad K Sangma-ba ra•chakangaha aro a•dokni score-ko namdapatna gita rake kamko ka•enga ine parakataha.
Meghalaya a•doko lekka porani tang•onangania bilsisa bilsignini gisepo ong•aha ong•ja indiba ru•uta bilsirangna galchipahani a•selsa ong•aha aro a•doko lekka porani gadangko tang•doatpilna gita uni sorkari rakbee kamrangko ka•engani gimin namdapaniko ra•bana gita adita somoirangko nanggen ineba Chief Minister aganaha.
Meghalaya a•doko komibeoba dam 200 skulrangko namdapatna gita kamrangko a•bachengmanaha aro da•o dam 500 gital skul nokrangna tarisomanaha ineba Chief Minister parakataha.
