Shillong, Oct 06: Meghalaya-ni PHE Minister Pa Renikton Lyngdoh Tongkhar, Shillong songjinmako rongtalgipa biap ong·atna gita re·mikkange kamko ka·tokchina dingtang dingtang gittimrango songdongenggipa manderang aro officer-rang gimikkon mol·molanga baksana, Shillong-ko India a·songoni rongtalbatsranggipa songjinmarang baksa chapatako man·na gita krengchinaba didiangaha.
Rongtal-an·talani bidingo nangchape a·dokni gadango Swachh Survekchan Grameen-ni workshop-ko Butbar salo ong·atgipao bakko ra·e agananganio, batanggimin 2020 bilsio survey ka·e man·giminko Swachh Survekchan-ni parakatgipao India a·songo rongtalbatsranggipa songjinmani skanggipa biapko Madhya Pradesh, Indore-ni brigipa changna joljol man·aniko janape a·dokni minister aganangaha.
Chasongnaba soe bon·gijagipa plastic-ko jakkalani gimin aro uko jakkalanichi samtangtangna pilak namgijaniko ra·baani gimin aganengon, uandakgipa jeng-jabolrangko gamona pil·baatskana nangani giminba minister aganangkuaha.
Swachh Bharat Abhiyan-ni miksonganiko ja·rike a·doko pilak rongtal-an·talatanirangko dakengani gimin janapatengon, rongtal-an·talataniko aro manderangna an·seng-baljokaniko ra·bana gita rake kamko ka·na nangengani giminba minister didianiko on·angjolaha.
Iarangni ja·man kobor ra·timgiparangna agananganio, workshop-ko ong·atani miksonganian rongtal-an·talanirangko ra·baani gimin aro an·seng-baljokanio monsonggipa nanggiparang aro tarigimin pilak namgipa cholrangko pangkamgipa ong·atani gimin mongsongbate ong·a ine PHE Minister talataniko on·angaha.
