Tura, Mar 19: Adita salrangna skang, an·tangko Garo Students Union (GSU) Phulbari regional unit-ni chief election commissioner ine a·kangenba, songbadrango seatgipa mandeni kosako GSU Phulbari unit jegalatenba, sawa ia mandeko GSU Phulbari unit-ni dilgiparangna u·iatchenggija election commissioner songaha ine sing·doataha.
Adita salrangna skangsan, GSU Phulbari regional unit-ni gital dilgiparangko GSU central executive committee (CEC)-ni president Tengsak Momin an·tangan ra·chake on·angahachim indiba ja·mano Probash D Sangma minggipa mande saksa, an·tangko GSU Phulbari regional unit-ni chief election commissioner ine a·kangatskaenba, ia unit-ni gital dilgiparangko jegalataha aro ia unit-ni gital dilgiparangko seokna gita re·baenggipa April jao election-ko ong·atenga ine parakatskaahachim.
Indake ong·engon, ia mandeni a·kanganiko GSU Phulbari regional unit-ni president Nyezer Chuang R Marak jegalatskaenba, da·o dipet GSU Phulbari unit-o election commissioner-ko songa dongkuja aro ia mande, GSU Western Zone (West) baksana GSU Phulbari regional unit-rangni meli-nangrime donganiko golmal ka·na jotton ka·enga gitasa ong·enga ine parakataha.
Iandake tol·e kobor on·aniko bebera·jachina gitaba GSU Phulbari regional unit-ni president Phulbari jolo songdongenggipa manderangko didiataha.
