Tura, Dec 20: Meghalaya sorkarini ra•gatgipa Piggery aro Milk Mission-ko Garo Hills-oba Sombar salo, Meghalaya a•dokni Chief Minister Conrad K Sangma a•bachengate on•angaha aro ia Mission-rangko a•bachengate on•anganio Animal Husbandry aro Cooperative Department-ni Principal Secretary GHP Raju baksana West Garo Hills a•jani Deputy Commissioner Ram Singh-ba dongpae bak ra•angaha.
Ia Piggery aro Milk Mission-ko Garo Hills-o a•bachengatna gita program-ko ong•atanio a•dokni Chief Minister, jinmana aganprakangengon, ia Piggery aro Milk Mission-ko ra•gatanichi sorkari, a•dokni chadamberangna man•dapanirangko on•na miksonganirang donga ine parakangaha.
Meghalaya a•doko metric ton 18,000-mangni gita bilsio wak be•enko cha•enga indiba metric ton (MT) 8000-mangni gitasan a•doko wak be•enko man•enga ine janapatengon, wak be•enni chu•onggijaniko gapatna gita chadamberang aro game ge•e cha•giparang, cooperative society-rangko bikote a•dok sorkarini ra•gatgipa program-rangko ra•na man•gen ine Chief Minister parakataha.
Meghalaya a•doko wak jilani, dudni bosturangko tariani, do•o jilani aro do•bok jilani kamrangko tang•doatna gita sorkari, gong kror 600-mangko koros ka•enga ineba Chief Minister parakataha.
Chief Minister-ni aganani gitade, ia sal somoirango sorkarini kamrangko tikate on•na man•jaengahani gimin jilla kaani kamrangko tang•doate chadamberangna janggi tangani cholrangko on•skana nikjumanganirang dongani giminsa sorkari, ia program-rangko ra•gate on•aha.
Meghalaya a•doko a•bachengatgipa program-rangoni ia piggery aro milk mission-ba dal•batgipa program-rang ong•a ineba ia tom•anio Sangma aganaha.
Gong kror 209 ong•gipa Piggery project-ara India a•songo dal•batsranggipa piggery program ong•e game ge•e cha•giparangna wakrangko jile cha•na cholrangko on•gen ineba Chief Minister aganaha.
Game ge•e cha•giparangko bakrimate sorkarini gita tangka paisarangchi dakchake on•enggipa FOCUS program-ni giminba ua ia tom•anio jinmana talate on•angaha.
Ia program-ko ong•atanio dol 26 piggery cooperative society-rangna aro dol 13 dairy cooperative society-rangna sudgrigipa loan-ni cheque-rangkoba Chief Minister-ni jakchi suale on•angjolaha.
Piggery Mission-ni ning•o gong kror 6.24-ko aro Milk Mission-ni ning•o gong kror 2.17-ko on•angaha.
