Shillong, Dec 17: Meghalaya Piggery Mission aro Milk Mission-ni ning•o Khasi aro Jaintia Hills a•jani dingtang dingtang cooperative society-rangna Sukrobar salo a•dokni Chief Minister Conrad K Sangma, Shillong songjinmani State Convention Centre-o cheque-rangko suale on•angaha aro ia cheque-rangko suale on•na gita tom•aniko ong•atanio a•dokni AH & Veterinary Minister Shanbor Shullai, AH & Veterinary-ni Principal Secretary GHP Raju aro Commissioner & Secretary Dr Vijay Kumar-ba dongpae bak ra•angaha.
Ia tom•anio a•dokni Chief Minister, jinmana aganprakangengon, ia sorkari, a•doko songdongenggipa manderangna nambate dangdike on•na jotton ka•engani gimin dingtang dingtang mongsonggipa kamrangna sorkarini koros ka•anirangba batroroengaha ine parakangaha.
Sorkarini ra•gate on•enggipa dingtang dingtang scheme aro program-rangko songsalo kangal cholgribatsranggipa manderangna sokate on•na man•na gita mongsonggipa department-rang, jekai Health, Education, Social Welfare baksana Agriculture, Animal & Husbandry aro uandakgipa department-ni kamrangko nambatatna nangenga ineba ia tom•anio Chief Minister aganangaha.
Meghalaya a•doko bilsiprakon metric ton 18,000-mangni gita wak be•enko manderang cha•enga indiba ia metric ton 18,000-oni 10,000-kode gipin biaprangonikosa ra•baenga ine janapatengon, a•doko wak be•enrangni chu•onggijaniko a•doktangan gapatna man•genchimode man•gnirangba a•doktangon ong•aigenchim ine Sangma aganaha.
A•dokni dam 12 Pig Breeding Centre-rangna dakchakaniko on•na gitaba Chief Minister ku•rachakaniko on•angaha.
Meghalaya a•dokni Milk Mission-na National Cooperative Development Society-ni gita gong kror 215.48 tangkarangko dakchake on•ahani gimin ian salgro salaram a•dokrango dal•batsranggipa Milk Mission ong•engachim aro ia Mission-chi a•dok gimikni te 2000 nokdangrang namgnirangko man•skagenchim. Ia Milk Mission-ni ning•o a•dok gimikni dol 40 cooperative society-rangna gimik gong kror 12.20-ni Loan on•ani chittirangko on•aha aro Piggery Mission-ni ning•oba dol 100 cooperative society-rangna gong kror 18.53-ni loan-rangko on•skaenga.
