Shillong, Apr 20: COVID-19 sajinmani somoio kangal cholrirangna ma•mong sorkarini ra•gatgipa Pradhan Mantri Garib Kalyan Anna Yojana (PMGKAY)-ni mirongrangko somoi gita sokate on•engani gimin Meghalaya a•dokni Food, Civil Supplies & Consumer Affairs Minister James K Sangma, an•tangni department baksana fair price shop dealer-rangko, wholesaler-rangko aro dingtang dingtang dolrangko mittelpilangaha.
Budbar salo, PMGKAY-ni bidingo Food, Civil Supplies & Consumer Affairs department-ni gita Jan Bhagidari Program-ko Main Secretariat-ni Yojana Bhavan Auditorium-o ong•atanio ua, PMGKAY-ni mirongrangko kangal cholgrirangna somoi gita sokate on•engani gimin ia scheme-o bak ong•enggipa dingtang dingtang dolrangko mittelpilangaha.
Ia Jan Bhagidari Program-ko ‘Azadi Ka Amrit Mahotsav Campaign’-ni bak gita ong•atangahachim.
Ia PMGKAY-ara a•songo cholgri ong•gipa manderangna, mirongrangko indin suale on•na gita ma•mong sorkarini ra•gatgipa scheme ong•a ineba Sangma parakangaha.
Ia scheme-ko India a•songona COVID-19 sajinma sokbaani ja•man sabisini batrikrikaniko champengna gita lockdown-ko ra•gatengmiting somoio 2020 bilsini April jaoni June jaona skanggipa ra•gatchengahachim. Uni ja•mano lockdown-ko changni chang a•songo ra•gatrorotaina nangahani gimin ia scheme-koba kangal cholgrirangna ra•dodapataha aro uandaken ia scheme-ko ia 2022 bilsini March jaoni 2022 bilsiona ra•dodapattaiahachim.
Ia program-ko ong•atanio FCS&CA-ni Principal Secretary Dr Shakil P Ahammed, FCS&CA-ni Commissioner & Secretary P Bakshi, East Khasi Hills a•jani Deputy Commissioner I Laloo aro gipinrangba dongpae bak ra•angaha.
