Shillong, Feb 7: Mongolbar salo, Meghalaya a•dokni Chief Minister Conrad K Sangma, Soil & Water Conservation Minister Marcuise N Marak-ni dongpaanio, a•dokni dingtang dingtang self help group (SHG)-rangna, Pradhan Mantri Krishi Sinchayee Yojana (PMKSY-WDC 2.0)-ni cheque-rangko suale on•ataha.
Ia scheme-ni ning•o, dingtang dingtang a•jani SHG dolpraknan gong 50,000 ka•e tangkarangko sualataha.
Ia tom•anio a•dokni Chief Minister, jinmana aganprakangengon, pilak a•songrangnan chiara namen nangchongmotgipa ong•a aro bang•bata a•songrangon ringani chirangko altuae man•rongja ine aganangaha.
Meghalaya a•doko bang•bea chiring chibisikrang aro chimarang donggenchimoba chirangko rakkianio bang•en neng•nikanirangko chagrongna nangronga ineba ua aganaha.
Meghalaya a•doko bang•bata manderangan janggi tangna gita buring bolgrim, a•a aro chirango pangchaktoka ine janapatengon, manderangna chirangko on•na gita sorkari, minggni cholrangko ra•gataha indiba manderang an•tangtangba an•tangtangna pangkamgipa janggi tangani cholrangko ra•na gita sorkari baksa bakrime, chiring chibisikrangko ripingna nanggen ine Sangma aganaha.
Iana skang, a•dokni Soil & Water Conservation Minister Marcuise Marak-ba jinmana aganprakangengon, PMKSY scheme-ni bidingo talataniko on•angenba, ian dingtang dingtang SHG-rangni tangka kamaina kamrangko ka•anio cholrangko on•na dakchakaha ine parakataha.
Iakoba poraie nina man·gen: Indo-Myanmar simao FMR ra·galaniko ENPO jegala
Watch
