Shillong, March 23: Pohkseh Water Supply Scheme-ko ia bilsini June jaon matchotatna nisanko done kamrangko ka·atenga aro ia project-ni matchota ja·man hajal 7,760 nokdangrang chirangko chu·onga gita man·gnok ine Public Health Engineering (PHE)-ko jako ra·enggipa minister Pa Marcuise N Marak, Bristibar salo assembly-o u·iatangaha.
Ia project-ko a·bachengna gita batanggimin 2018 bilsini March 29 tariko a·dok sorkari tangka-paisarangko chamatahachim ine nikatna gita man·gen.
Iani bidingo Nongthymmai-ni AITC MLA Pa Charles Pyngrope-ni assembly-o sing·anina aganchakaniko on·angengon, Pa Marak, kamrangko a·bachengna gita gong kror 85,84,600.00 tangkarangko sorkari ua somoio chamaha, uanoniko gong kror 45,59,441.00-rangkode da·alona jakkalaha ine u·iatangaha.
Indake ong·genchimoba, nokdangantina chirangko sale on·anikode scheme-o napchapata dongja, maina, ia kamko biapni Dorbar Shnong-rangsa jako ra·enga ine Pa Marak parakataha.
Project-ni pilak kamrang ja·manchakenga aro namen ka·sinenga ine Pa Pyngrope-ni assembly tom·anio sing·doaniko dakanganina aro project-ni biapona re·ange niechina gita minister-ko mol·molanganina, Pa Marak, ia mamlako an·tangan nirokatna gita MLA-na ka·dongatanikoba on·angaha.
Iana skang, project-na a·ako on·gipa biap namen chel·a aro tubewell-ko dapna gita korosrangkoba bang·en nangachim, uni gimin, korosko komiatna gita aro song sambaoniko damgipin a·ako on·china gita department bi·aha je a·akon da·o Dorbar Shnong sandie on·aha ineba PHE minister u·iatjolaha.
Iakoba poraie nina man·gen: A·dokni chadamberangna jakma-ba·kuni kamrangko skie on·na nisanko donenga: Skotong minsiter
