Shillong, Sept 19: Meghalaya Police-o nape kamo dangdike on·na sikgiparang, batanggimin bilsio dingtang dingtang porikkarangko ka·angoba uni result-rangko da·onan parakatkujaengani gimin suk ong·jae Sombar salo Shillong-ni MBoSE office sambao asonge jegalaniko dakangaha.
Iani bidingo police-o napnasienggiparangni kobor ra·timgiparangna aganatani gita, batanggimin 2019 bilsion uamang police post-na dorkastorangko on·aha, indake Physical Efficiency Test-ko 2021 bilsini November jao ka·angahaoba, written test examination-kode mija February jaosa ong·ataha, indiba jasni ong·pilahaoba uni result-rangko da·onan parakkujaenga ine aganangaha.
“Ramarangona ong·katgrime jingjengataniko dakatana agre chingo minggipin chol dongjaha, maina chinga ua porikkao chu·sokoba, chu·sokjaoba uni result-ko knana chingo bil donga”, ine police-o napna am·enggipa Shine Marweiñ aganaha.
Shine-ni u·iatani gita, gimik sak 3000 mangni gita police-o napna dorkastoko on·giparang da·o result-rangko sengtokenga, uni gimin result-rangko parakatna gita tarikko u·iatchina ua dingtangmancha a·dok sorkario dabiangjolaha.
