Shillong, March 17: Public works department (PWD) ni Executive Engineer Ransom Sutnga politicalni gita jak dongani bidingo am⋅sandie una explanation noticeko on⋅na tik ka⋅aha ine Deputy Chief minister Prestone Tynsong aganaha. Meghalaya service ruleko pe⋅ani gimin Ransom Sutngani kosako ja⋅kuko de⋅na nanga ine Rangsakonani MLA Zenith M Sangmani sing⋅anina aganchakengon, Iani kosako am⋅sandina aro Meghalaya service rules 2019-o pangchake kam ka⋅anggen ineba minister aganchakaha. Koborniko am⋅sandie u⋅iatengon, PWD ni executive engineer Ransom Sutnga aro Rajya Sabhani MP Dr. WR Kharlukhi jean da⋅omiting NPPni a⋅dokni padotba ong⋅engachim uamang party meetingko Shillong North constituencyni ning⋅o ong⋅ataha, aro ua tom⋅anio Ransom Sutngako re⋅baenggipa election-o NPP candidate ong⋅e North Shillongo chakatanggen ineba parakataha ine Zenith M Sangma aganaha. “ Ransom Sutnga PWD ni executive engineer ong⋅enga indiobas politicso jak on⋅pae kam ka⋅enganiara niamni a⋅palo ong⋅jaengama?” Zenith Sangma sing⋅doaha.
“Sorkarini kamko jako ra⋅e ka⋅enggipa sakanti darang political dolrang baksa jak on⋅pana man⋅ja aro saoba indake dakenchimode niamni a⋅palo ong⋅enga, aro saoba niamko manijaode uamangni kosako raken ja⋅kuko de⋅na nangchongmota aro ian mikkangchina namgni ong⋅chongmoygen ine Sangma niam pe⋅gipani kosako jak de⋅china dabiangaha.
