Shillong, May 25: India a·song gimikon COVID-19 batrikrikengon, iandakmitingo somoirango porikkarangko ong·atani bidingo chanchina skangba ma·mong sorkari, COVID-ni tikarangko su·ani giminsa chanchichengna nangenga ine Meghalaya a·dokni Education Minister Lahkmen Rymbui parakataha.
India a·song gimikon gnigipa changna COVID-19-ni giproroaniko champengna kamrangko ka·tokengon, bang·bata a·dokrangon class 12 aro class 10-ni porikkarangko dontongatchenge lockdown aro curfew-rangko ra·gattokahachim ine nikna man·a.
Class 10-ni chatro chatrirangna porikkani result-rangko skulrango ra·gipa porikka aro gitcham porikkarango man·gipa mark-rangko niroke on·na miksongengon da·o dipet bang·bata a·dokrangon class 12-ni porikkarangkode matchote ra·ani bidingo chanchitokskakujaengachim.
Indake ong·engon, CBSE-ni class 12 porikkako ong·atani bidingo chanchirimna gita Defence Minister Rajnath Singh-ni dilanichi tom·aniko ong·atanio dingtang dingtang a·dokni education minister-rang aro dingtang dingtang a·dokni secretary-rangba bakko ra·angaha aro bang·bata a·dokrangan ia porikkako ong·atna nangniktokahaoba mitamrangde da·o dipet ia porikkako ong·atna nangnikgijaniko parakskaaha.
Iani bidingo Meghalaya a·dokn Education Minister Lahkmen Rymbui-ba talataniko on·angengon, chatro chatrirangni namgnina class 12-ni porikkako ong·atna nangchongmotenga indiba da·o gita sabisi giprorokuengmiting somoiode porikkako ong·atani bidingo chanchikugija COVID-ni tikarangko su·ani giminsa ma·mong sorkari chanchichengna nangenga ine parakataha.
Ma·mong sorkarini ge·etanio pangchake mikkangchi a·doko class 12-ni porikkako ong·atani giminba chanchianggen ine Rymbui parakataha.
